Eminentissime Domine Cardinalis,
Sacri Romani Imperii Princeps,
Archiepiscope ac Præsul gratiosissime!
Infrascriptus ad gratiosissimum Eminentiæ Vestræ Mandatum de dato 11a Septembris a. c. emanatum et sibi die 13a ejusdem mensis exhibitum, quo in conformitate Benigno-gratiosi Intimati, de dato 9a Augusti a. c. sub No 18965 ab Excelso Consilio R. L. H. emanati, originale manuscriptum Tomi secundi Historiæ Milloti a se in hungaricum versæ, Eminentiæ Vestræ præstare jubetur, humillime reponendum habet:
Se in possessione manuscripti hujus non existere, illudque in manibus Domini Matthiæ Trattner, Typographi Pestiensis, qui expensas in hunc Tomum necessarias cum Domino Weingand Bibliopola itidem Pestiensi tulit, reperiri. Idem vero Manuscriptum ab Infrascripto, occasione investigationis in primam partem factæ, Excellentissimo Domino Josepho e Comitibus de Haller, qua interimali Præsidenti, ac Magnifico Domino Consiliario de Klobusiszky, qua Referenti – ad illud comprobandum: quod secundam partem, Censuræ frustatim substratam A. R. D. Hübner intra medium annum, utpote ab exitu anni 1790 usque ad Mensem Majum anni 1791, quo tempore idem Dominus Censor plenissima adhuc sanitate gaudebat, quinquies subscripserit, et quod accusationem primæ partis, post decursum duorum annorum et post ipsam secundæ partis adprobationem A. R. D. Rhiethaller ideo tantum instituerit, ut Infrascriptum, qui pro Officio Revisoratus Librorum competebat, tanquam hominem, suis actionibus, nunc jam coram majori Nationis Hungaricæ parte legaliter suspectis, plus, quam ipsi placuisset, invigilaturum, a latere suo abarceat, – exhibitum fuisse. Infrascriptum nihilominus paratissimum esse, ut accepto vel minimo Eminentiæ Vestræ nutu, præmemoratum Dominum Trattner ipsemet adloquatur, quatenus postulatum Manuscriptum Eminentiæ Vestræ aut exhibere, aut exhibendum sibi committere velit, qui coeteroquin Paternis gratiis non minus, quam gratiosissimus favoribus humillime commendatus, perseverat
Eminentiæ Vestræ
Budæ, die 14a Septembris 1793.
obsequentissimus servus
Franciscus Versegi
AA. LL. et Phil. Doctor,
et emeritus Capellanus
castrensis.
[A külzeten Verseghy Ferenc kezével:]
Ad
Eminentissimum ac Reverendissimum S. R. E. Tituli S. Bartholomæi in Insula Presbyterum Cardinalem, S. R. I. Principem, et Dominum Josephum e Comitibus de Batthyán, Perpetuum in Németújvár, Ecclesiæ Metropolis Strigoniensis Archiepiscopum, Sacræ Sedis Apostolicæ Legatum natum, I. Regni Hungariæ Primatem, summum et secretarium cancellarium, Insignis Ordinis S. Stephani Regis Apostolici Prælatum, et Magnæ Crucis Equitem, IIlustrissimi Comitatum Castriferrei quidem perpetuum, Strigoniensis vero Supremum ac itidem perpetuum Comitem, Sacratissimæ Cæsareæ et Regio-Apostolicæ Majestatis Actualem intimum status et Ex. Consilii R. L. H. Consiliarium, ac ad Ex. Tabulam Septemviralem Cojudicem, Dominum gratiosissimum
humillima responsio
Francisci Versegi
circa originale Manuscriptum Tomi 2di
Historiæ Millotianæ a se Versæ