I. Copia primi supplicis libelli:
Serenissime!
Infrascriptus humillime supplicat: officium Censoris seu Revisoris librorum Regii Budensis per mortem A. R. D. Michaelis Hübner vacans, sibi benigne conferri, e sequentibus motivis:
1o) Quia supplicans per hanc sui adcommodationem e statu pensionis egrederetur.
2o) Quia per reliquias infirmitatis diutinæ, per servitia Regia in castris Zemlinensibus, ut ex adnexo sub A testimonio patet, præstita contractæ, quibuscunque aliis seu ecclesiasticis seu scholaticis muniis gerendis impar redditus, perpetuo Fundi publici oneri futurus est, nisi servitia in sedentario, ut ajunt, quopiam officio, quale Censoris librorum est, et quale unicum gerere potest, præstare potuerit.
3o) Quia præterquam, quod penes pensionem suam in Cellis Vetus Budensibus ante bellum Turcicum semialtero anno capellanum militarem egerit; post reditum suum e castris, inaudita plusculorum Censuræ Regiæ Budensis laborum fama, sese pro ejusdem Censuræ Adjuncto et quasi practicante per supplicem libellum ad Ex. Consilium R. L. H. anno 1789 porrectum, itidem penes pensionem suam obtulit.
4o) Quia, quod aptitudinem suam ad hoc officium adtinet, præter maternam linguam hungaricam, etiam germanicam æque, slavicam vero in tantum callet, ut libros in hac lingua forte prodituros intelligere possit. Utrum vero coeteris dotibus necessariis instructus sit? id decisioni cujuscunque in se instituendi experimenti lubens subjicit.
Humillimas igitur preces suas enixim renovat: dignetur Serenitas V. R. et Ex. Consilium R. L. H. petitionem hanc ad Altissimum Sacratissimæ suæ Cæsareo-Regiæ Majestatis Thronum non tantum gratiose promovere, sed et potentissimis votis suis benigne subfulcire.
Budæ. Die 16. Augusti 1792.
Franciscus Eugenius Versegi
aboliti Paulinorum Ord[inis] Sacer[dos]
[Melléklet:]
II. Copia Testimonii in primo supplici libello sub A provocati.
In nomine Domini Dei Exercituum!
Cum A. R. D. Eugenius Franciscus Versegi Presbyter sæcularis, meus olim in castris ad Cæsareo-Regium Exercitum principalem Socius, ob non faventem Eidem harum partium auram et exinde enascentes infirmitates officio suo valedicere coactus fuerit, ac Budam (ibidem capellano præsidiario A. R. D. Joanni Ley in præstandis militiæ obsequiis spiritualibus, ubi necessitas fuerit, adjuturus futurus) reverti velit; hinc præsentium vigore testor, suprarelatum sacerdotem partibus sui muneris exacte satisfecisse, et vitam exemplarem duxisse. Eum proinde charitate omnium, ad quos pervenerit, et præstandæ fors necessariæ assistentiæ plurimum commendo. Signatum in quarterio generali Exercitus principalis ad Semlinum die 5a Junii 1788.
(L. S.) P. Nicolaus Milassin. m. p.
Superior et Vicarius Generalis
Castrensis ad Cæsareo-Regium
Exercitum.