Serenissime Princeps Regie,
Archidux Austriæ, ac regni Hungariæ Palatine!
Excelsum Consilium Regium Locumtenentiale Hungaricum!
Infrascriptus ad Benigno-gratiosam Celsitudinis Vestræ Regiæ necnon Excelsi Consilii Regii Locumtenetialis Hungarici de dato 17. septembris 1793. sub No 25346. emanatam Indorsationem, qua semet super eo, quod requisita ad gerendum Revisoratus Librorum Officium eruditione et linguarum, utpote hungaricæ, latinæ, germanicæ, slavicæ et gallicæ cognitione polleat, legitimare, et super his necessaria fidedigna Attestata Ex. Consilio R. L. H. exhibere jubetur, humillime reponendum habet:
Sanitatem suam, jam antea satis debilem, inde a factis pro conferendo sibi hoc officio precibus, per novas et notabiles ejusdem vicissitudines adeo enervatam, viresque tam corporis quam animi tantopere fractas esse, ut sive vigor ad gerenda quævis munia necessarius, sive naturalis obligatio conservandæ sanitatis ac vitæ spectetur, in conscientia neque istud, neque quodcunque aliud officium petere aut assumere possit. Se proinde a prima petitione sua, cum humillima gratiarum actione pro habita sui Benigno-Gratiosa Reflexione, recedere debere.
Qui in reliquo Altis Gratiis Celsitudinis Vestræ Regiæ, necnon Excelsi Consilii Regii Locumtenentialis Hungarici humillime recommendatus, perseverat
Celsitudinis Vestræ Regiæ
necnon Excelsi Consilii Regii Locumtenentialis
Hungarici
Budæ die 3a Decembris 1793.
infimus capellanus
Franciscus Versegi.
[A külzeten Verseghy Ferenc kezével:]
Ad
Serenissimum Hungariæ et Bohemiæ Regium Hæreditarium Principem et Archiducem Austriæ, Dominum Alexandrum Leopoldum, Regni Hungariæ Palatinum et Locumtenentem Regium, necnon Excelsum Consilium Regium Locumtenentiale Hungaricum
humillima repræsentatio
Francisci Versegi
a prima petitione sua
de conferendo sibi
Revisoratus Librorum
officio facta, ob enervatam
suam sanitatem
recedentis.