Infrascriptus, quum ex benigno-gratioso Intimato Serenitatis Vestræ Regiæ ac Excelsi Consilii R. L. H. ad Magistratum Civicum Pestiensem de dato 23 Octobris anni currentis sub No 24124. dimisso, vi cujus Bibliopola pestiensis Weingand censuram libri: A’ világnak közönséges Történetei, írta frantzia nyelven Abbas Millot. Első Kötet, a Cæsareo-Regio Viennensi Librorum Revisoratu, prout e protocollo ejusdem clare videri potest, reipsa institutam, ac subscriptione Domini Spectabilis secretarii Hoffinger, ac Admodum Reverendi Domini Revisoris Szekeres de dato 30. Aprilis 1790 firmatam eidem Magistratui significare debuit; delationem contra hunc librum factam fuisse animadvertat, quumque non sine ratione vereri possit, ne Relatio circa hunc suum librum facta personali suo honori ac existimationi noxia evadat: humillime apud Serenitatem Vestram Regiam et Excelsum Consilium R. L. H. supplicat: quatenus præfatam Revisoratus Officii relationem, ut ad ejusdem puncta Supplicans legaliter respondere possit, in paribus sibi extradari curare benigno-gratiose dignetur, e sequentibus motivis:
1o Quia præcipuum publici Regiminis officium est, ut privatorum civium honori ac existimationi, quam ipsa physica vita pretiosiorem esse certum est, contra quosvis Invasores consulat, atque illis, qui notam sibi publice impactam legaliter detergere capiunt, auxiliares manus præbeat.
2o Quia Supplicans fundatas rationes habet, dubitandi: an non forte Revisoratus Officium per Malevolos quosdam ad dictam relationem contra hunc Librum jam per integros duos annos publice notum nunc primo faciendam, ideo tantum inductum sit: ut per publice inustam scriptis ac ne fors etiam personae ejusdem Supplicantis notam ab omni spe obtinendi Revisoratus Officii, quod sibi conferri per supplicem libellum de dato 16. Augusti anni currentis ab Serenitate Vestra Regia et Excelso Consilio R. L. H. flagitaverat, abarceatur.
Supplicans proinde ex ea etiam ratione, ne praelibatae petitionisuæ injusta obstacula ponatur, et quam præter adnexa in prælibato libello de dato16. Augusti anni currentis motiva, ob eum etiam respectum humillime renovet, quod
primo: Artium Liberalium et Philosophiae in universitate Pestiensi graduatus Doctor,
secundo: natus Hungarus, ac proinde patriæ filius,
tertio: germanus exactus et in linguis italica et gallica, quamvis easdem non loquatur, satis tamen ad hoc versatus sit, ut libros in iisdem scriptos facili negotio intelligere possit;
per communicationem sæpefatæ relationis, modum sese legaliter purgandi sibi benigno-gratiose procurari facere enixissime flagitat, imo etiam a justitia et æquitate Serenitatis Vestræ Regiæ ac Excelsi Consilii Regii Locumtenentialis Hungarici, cum plena sui, causaeque suæ sub benigno-gratiosum Ejusdem patrocinium submissione, humillime obtestatur.
Budæ, in Aquatica, in platea ab urso
nigro denomitata, No 480.
Die 2a Novembris, 1792.